ხშირად დასმული კითხვები ავტორიზაცია  |  რეგისტრაცია
ხვანი
იმერეთი

სოფელი მდებარეობს მდინარე ძირულას ხეობაში, მდინარის ორივე მხარეს. ჩრდილოეთით ესაზღვრება სოფელი კორბოული. სამხრეთით _ სოფელი ჭალოვანი. დასავლეთით _ჭალოვანი, აღმოსავლეთით სოფელ ხვანს ესაზღვრება ლიხის ქედის დასავლეთი ფერდობი ტყის უზარმაზარი მასივით

სოფლის ყველაზე დაბალი ადგილია სოფლის სამხრეთ-დასავლეთ ნაწილში, მდინარე ძირულას ხეობაში, სიმაღლე ზ.დ. 790 მეტრი, ხოლო მაქსიმალური ადგილია, უკიდურეს სამხრეთ ნაწილში, სოფლის ტყის ტერიტორიაზე ზ.დ. 950 მეტრი. სოფლის ცენტრის სიმაღლე ზ. დ. 800 მეტრია. სოფელი ხვანი დასავლეთიდან აღმოსავლეთისაკენ ვრცელდება მდინარე ძირულას ხეობის გაყოლებით საშუალოდ 3 კმ-ზე, ხოლო, ჩრდილოეთიდან სამხრეთისაკენ დაახლოებით 4 კმ-ზე.

სოფელი ხვანი მდებარეობს ლიხის, ანუ სურამის ქედის დასავლეთ პერიფერიაზე. ლიხის ქედი, სურამის ქედი, კავკასიონისა და მცირე კავკასიონის მთათა სისტემების დამაკავშირებელი ქედია, რომელიც საქართველოს ყოფს აღმოსავლეთ და დასავლეთ ნაწილებად (ძვ. წყაროებით „ლიხთიმერად“ და „ლიხთამერად“). ლიხის ქედი კასპიისა და შავი ზღვების წყალგამყოფია. შუა მონაკვეთი ტექტონიკურად ეკუთვნის ძირულის კრისტალურ მასივს, ჩრდილოეთი - კავკასიონს, სამხრეთი - მცირე კავკასიონს. ქედის სიგრძე ერწოს უღელტეხილიდან ლომისმთამდე 102 კმ-ია. აბსოლუტური სიმაღლე ცვალებადობს 900-2471 მ ფარგლებში. ლიხის ქედი ასრულებს კლიმატგამყოფის როლს, მაგრამ კოლხეთისა და აღმოსავლეთ საქართველოს კლიმატურბოტანიკური ოლქების საზღვარი წყალგამყოფს კი არ მიუყვება, არამედ ქედის აღმოსავლეთ კალთებს. ქედის უმეტესი ნაწილი ფართოფოთლოვანი ტყითაა შემოსილი (მუხა, რცხილა, წაბლი, წიფელი). განაპირა ნაწილებში წიწვიანებიცაა. ქედში გაყვანილია წიფის სარკინიგზო და რიკოთქვეშა საავტომობილო გვირაბები, ხოლო ქედზე გადის ხაშურ-ზესტაფონის და გომ-საჩხერის საავტომობილო გზები.

სოფელი ხვანი შედის ჭალოვნის თემში, მანძილი  ცენტრამდე 6კმ-ია, ხოლო მანძილი სოფელ ხვანიდან ქალაქ საჩხერემდე 27 კილომეტრია, მოსახლეობის რაოდენობა 2007 წლისათვის შეადგენდა 83 კომლი 260 სული მცხოვრებით. 2002 წლის აღწერის მონაცემებით კი 243 მაცხოვრებელი იყო, აქედან 117 იყო კაცი, ხოლო 126 მაცხოვრებელი იყო ქალი.

ხვანში გავრცელებული გვარებია: შუბითიძე, მაჭარაშვილი, რიკაძე, შავაძე, კილაძე, ხარაიშვილი, ბაძგარაძე, ლომსაძე, ყიფშიძე, გელაშვილი.

სოფელ ხვანში არსებული ისტორიული ძეგლებია: ხვანის ,,ნასაყდარი” (გვიანი შუასაუკუნეები); ხვანის  წმ. გიორგის სახელობის ეკლესია (XIX  ს);

  

სოფლის მეურნეობის ძირითადი დარგებია: მესიმინდეობა, მეცხოველეობა, მეფუტკრეობა. სოფლის ტერიტორიაზე გაედინება მდინარე ძირულა. სოფელი საჯარო სკოლით სარგებლობს სოფელ ჭალოვანში, მანძილი სკოლამდე 5 კმ-მდეა.

 

ავტორი: გიორგი დვალაშვილი

ყველა უფლება დაცულია


© 2011-2017, TRAVEL IN GEORGIA.