ხშირად დასმული კითხვები ავტორიზაცია  |  რეგისტრაცია
სიახლეები
ვარდისუბანში თეთრი გიორგის ეკლესიას კულტურული მემკვიდრეობის ძეგლის სტატუსი მიენიჭა
14 თებერვალი, 2018

თელავისს მუნიციპალიტეტის, სოფ. ვარდისუბანში მდებარე VI-VII საუკუნეების თეთრი გიორგის (დეკანოზური) ეკლესიას კულტურული მემკვიდრეობის უძრავი ძეგლის სტატუსი მიენიჭა.

თეთრი გიორგის ეკლესია (დეკანოზური) აშენებულია მე-6-7 სს. აღდგენილია მე-16 ს.-ში.

დეკანოზური კომპლექსია, რომელიც მოიცავს: წმ. გიორგის სახელობის სამეკლესიან ბაზილიკას; მცირე ეკლესიის ნანგრევს და გალავანს.

წმ. გიორგის ეკლესია (20×12.2 მ) სამეკლესიანი ბაზილიკაა. ნაგებია რიყის ქვით, კუთხეებში, კონქის სატრიუმფო თაღში და სარკმელში გამოყენებულია შირიმი. გადაკეთებისას ნახმარია აგური. გადახურული იყო ცისფრად მოჭიქული ბრტყელი და ღარიანი კრამიტით. ცენტრალური ეკლესია სიმაღლეში ორნახევარჯერ აღემატება სიგანეს. აღმოსავლეთით ნახევარწრიული აბსიდია, რომლის შირიმით გამოყვანილი კონქი მხრებზე გადასულ სატრიუმფო თაღს ეყრდნობა. აბსიდის ღერძზე მაღალი თაღოვანი სარკმელი იყო გაჭრილი. შესასვლელი სამი მხრიდან აქვს. სამივე კარი შიგნიდან სწორი გადახურვით სრულდება, გარედან კი გადაკეთების დროს შეისრული თაღით დაუსრულებიათ. გრძივ კედლებზე სამ-სამი თაღოვანი სარკმელია, რომლებიც აღდგენის დროს აგურითაა გამოყვანილი. კამარა კედლებზე შეკიდულ აგურის ორ წყვილ თაღს ეყდნობოდა. მთავარი ტაძრის ჩრდილოეთით და სამხრეთით პასტოფორიუმებია (სამკვეთლო და სადიაკვნე), რომლებიც ცენტრალურ ეკლესიას კარით უკავშირდება (სამკვეთლოსთან მაკავშირებელი კარი ამჟამად ამოშენებულია). ტაძრისა და გარშემოსავლელთა კედლები აგურის საფეხუროვანი ლავგარდნით იყო დასრულებული. მთავარი ტაძრის სამხრეთი კედლის პირზე, ერთმანეთის პირისპირ ქართული ასომთავრულით შესრულებული ნაკაწრი წარწერებია. აღმოსავლეთის სარკმელს ქონია ნალისებური თაღების მწკრივით გაფორმებული შუბლი (ამჟამად ჩამონგრეულია).

ტაძრის ჩრდილო-აღმოსავლეთით მცირე სამლოცველოს ნანგრევია. ნატეხი ქვით ნაგები შენობისგან ამჟამად განირჩევა აბსიდის ნაწილი, რომელიც დარბაზისგან მხრით ყოფილა გამოყოფილი.

ეკლესიას გარშემოუყვებოდა ქვის ყორე გალავანი, რომელიც ახლა მხოლოდ სამხრეთიდან და დასავლეთიდანაა შემორჩენილი. 

www.travelingeorgia.ge


© 2011-2017, TRAVEL IN GEORGIA.