ხშირად დასმული კითხვები ავტორიზაცია  |  რეგისტრაცია
სიახლეები
თბილისის გენგეგმა დეველოპერებს გააცნეს
12 ივლისი, 2018

თბილისის მერმა კახა კალაძემ სამშენებლო სფეროს წარმომადგენლებს დედაქალაქის მიწათსარგებლობის გენერალური გეგმა გააცნო. თავის მხრივ თბილისის მერს საკუთარი მოსაზრებები სამშენებლო სექტორის წარმომადგენლებმაც გააცნეს.

„სამშენებლო სექტორის წარმომადგენლებთან შეხვედრაზე თბილისის მერმა გენერალური გეგმის პროექტი წარადგინა. განვიხილეთ ასევე, ის ძირითადი გამოწვევები, რაც ქალაქის განვითარების მიმართულებით არსებობს. სამომავლო ღონისძიებები ერთობლივად დავგეგმეთ, მათ შორის, კანონმდებლობის ფორმირებისა და სერვისების გაუმჯობესების თვალსაზრისით. მერია მუდმივად ღია და გამჭვირვალე იქნება - მიიღებს ყველა იმ სამართლიან შენიშვნას, რომელიც სერვისების მიწოდების ნაწილში შეიძლება არსებობდეს. შევჯერდით, რომ გენერალური გეგმა, რომელიც თბილისის საკრებულომ უნდა დაამტკიცოს, ის ფუძემდებლური დოკუმენტი იქნება, რომლის სწორი გამოყენება ქალაქის განვითარების წინაპირობა უნდა იყოს“, - განაცხადა მაია ბითაძემ.

დედაქალაქის მერიაში გამართულ შეხვედრას 50-მდე ორგანიზაციის, მათ შორის, მენაშენეთა ასოციაციის 35 წევრი და არაწევრი ორგანიზაციების წარმომადგენლები ესწრებოდნენ.

„გავეცანით გენერალურ გეგმას და ვიმსჯელეთ ყველა იმ საკითხზე, რომელიც დეველოპერების ინტერესის საგანს წარმოადგენს. ვფიქრობთ, ის შენიშვნები, რაც გვაქვს, მერიას წერილობითი სახით წარვუდგინოთ. არსებობს ბევრი პრობლემა, მაგრამ ჩვენთვის მთავარია, რომ ტენდენცია უკეთესობისკენ მიდის“, - განაცხადა მენაშენეთა ასოციაციის თავმჯდომარე ირაკლი როსტომაშვილმა.

www.travelingeorgia.ge

 


© 2011-2017, TRAVEL IN GEORGIA.