ხშირად დასმული კითხვები ავტორიზაცია  |  რეგისტრაცია
სიახლეები
თბილისი შემოდგომაზე თეატრალურ ფესტივალს უმასპინძლებს
13 ივნისი, 2018

თბილისი 14 სექტემბრიდან მეათე თეატრალურ ფესტივალს უმასპინძლებს. როგორც თბილისის მერიაში ამბობენ, ფესტივალი არა მარტო საქართველოს ერთ-ერთი მთავარი კულტურული მოვლენა, არამედ კავკასიისა და აღმოსავლეთ ევროპის ქვეყნების ფესტივალებს შორის ერთ-ერთი ლიდერია.

„თბილისში დიდი დღესასწაული იწყება, რომელსაც თეატრალური ფესტივალი ჰქვია. ქალაქში ცხრა საერთაშორისო რანგის დასი ჩამოდის. ვინაიდან, ფესტივალი ათი წლის ხდება, პროგრამა ძალიან განსხვავებული და მრავალფეროვანია. მომავალ წელს კი, ის კიდევ უფრო მასშტაბური გახდება - დაემატება თეატრალური ბაზრობა, რაც კიდევ უფრო მეტ შესაძლებლობებს გვაძლევს. თბილისი რეგიონში კულტურის დედაქალაქი უნდა გახდეს და მსგავსი ფესტივალები ამ პროცესს ხელს უწყობს“, - განაცხადა თბილისის მერის მოადგილემ  სოფიო ხუნწარიამ.

ცხრა წლის განმავლობაში, თბილისის საერთაშორისო ფესტივალმა მსოფლიოს სხვადასხვა ქვეყნიდან 170 კომპანიას უმასპინძლა. წელს კი, ღონისძიებას 80-ზე მეტი სტუმარი ეწვევა, რომლებიც სხვადასხვა ფესტივალს, თეატრსა და საპროდიუსერო კომპანიას წარმოადგენენ.

მეათე საერთაშორისო თეატრალური ფესტივალი მიხეილ ბარიშნიკოვს, თაიგერ ლილიზს, ცირკ ელუაზს, თალია თეატრს ნინო ხარატიშვილის რომანით „მერვე სიცოცხლე (ბრილკასთვის)“ და სხვა ერთმანეთისგან განსხვავებულ და საინტერესო ფორმის წარმოდგენას აერთიანებს.

ქართული თანამედროვე თეატრის გასაცნობად, ერთობლივი და გაცვლითი პროექტების დასაგეგმად, პროდიუსერები თბილისს მსოფლიოს სხვადასხვა ქვეყნებიდან სტუმრობენ. გასული წლების განმავლობაში, საერთაშორისო სტუმრების რაოდენობა 500-ს, ხოლო მაყურებელთა რაოდენობა 43 500-ს აღემატება.

თბილისის საერთაშორისო თეატრალური ფესტივალი 30 სექტემბერს დაიხურება.

www.travelingeorgia.ge


© 2011-2017, TRAVEL IN GEORGIA.