ხშირად დასმული კითხვები ავტორიზაცია  |  რეგისტრაცია
სიახლეები
რატომ შეჩერდა კურორტ «ახტალის» განვითარება? - „ინვესტორებს კონკრეტული ინტერესი ამ დრომდე არ აქვთ»
19 აპრილი, 2017

სამკურნალო-ბალნეოლოგიური კურორტი ახტალა" საბჭოთა პერიოდის შემდეგ არ განვითარებულა. კურორტის რეაბილიტაციის პროექტი, რომელიც 2012 წლის აპრილში, საქართველოს იმდროინდელი პრეზიდენტის მიხეილ სააკაშვილის ინიციატივით დაიწყო, ახლა შეჩერებულია. კურორტზე სრულად ამორტიზებულია სანატორიუმის მიმდებარე ტერიტორია, რაც შეეხება სანატორიუმს, ის დამსვენებელს დღემდე ძველი, საბჭოთა პერიოდის ინფრასტრუქტურით იღებს.

„კომერსანტი" დაინტერესდა, რა ხდება ახლა კურორტზე, რატომ შეჩერდა ახტალის განვითარების გეგმის განხორციელება და როდის იგეგმება „ახტალის" საერთშორისო სტანდარტების მქონე კურორტად ქცევა?

კურორტ „ახტალის" ხელმძღვანელი გიორგი უტიაშვილი განმარტავს, რომ ამ ეტაპზე ახტალა ისევ სახელმწიფოს მართვაშია და ინვესტორი ჯერჯერობით არ გამოჩენილა. მისი განცხადებით, 2012-2013 წლებში კურორტის მიმდებარე ტერიტორიის რეაბილიტაცია ჩატარდა, თუმცა, მას შემდეგ არაფერი გაკეთებულა. როგორც უტიაშვილი აცხადებს, კურორტს მიუხედავად მოძველებული ინფრასტრქტურისა, სეზონზე (ივნის-ნოემბერი) დამსვენებელი მაინც ჰყავს. მათ შორის, ადგილობრივები, მეზობელი ქვეყნებიდან (რუსეთი, აზერბაიჯანი) , ისრაელიდან და ევროპიდან.

უტიაშვილის განცხადებით, შემუშავებულია კურორტის რეაბილიტაციის გეგმა, რომელიც ინვესტორის არსებობის შემთხვევაში უნდა განხორციელებულიყო.

„დაინტერესება არის, მოდიან და მიდიან, თუმცა, კონკრეტული არაფერია. უნდა გაკეთდეს კარგი სანატორიუმი, კარგი სასტუმროთი და სასადილოთი. სააბაზანოა საჭირო, ტალახის მიღება ავტომატიზირებულად უნდა იყოს, ასეთ კომპლექსში კი ვინც ფულს ჩადებს, აქამდე არ ჩანს. სახელმწიფო ცდილობს, მოჰყავთ ინვესტორები, თუმცა ძალით ხომ ვერავის ჩაადებინებ ფულს? "-აცხადებს უტიაშვილი. მისი შეფასებით, კურორტი „ახტალას" განვითარებისთვის დაახლოებით 8-10 მილიონი დოლარის ინვესტიციაა საჭირო.

მისივე თქმით, ახტალაში დასვენება 1 ადამიანზე, დღეში საშუალოდ 70 ლარი ჯდება.ამაში შედის სამჯერადი კვება, ტალახის პროცედურები, ფიზიოთერაპია.

როგორც ცნობილია, სს "ახტალა" საპრივატიზაციო ნუსხაში 2015 წლიდანაა. დღეს სახელმწიფო ქონების ეროვნულ სააგენტოში აცხადებენ, რომ ობიექტი პროექტი „50 ქონება შენი სასტუმროსთვის" ნუსხაშია შესული. ობიექტის 99.68 პროცენტიანი წილი 4 340 405 ლარად იყიდება.

სააგენტოს ინფორმაციით, ინვესტორი ვალდებულია მოაწყოს არანაკლებ 80 ნომრიანი სასტუმრო, შეინარჩუნოს სამედიცინო პროფილი და განახორციელოს 6 მილიონი ლარის ინვესტიცია.

გურჯაანში მდებარე სამკურნალო კურორტ „ახტალას" რეაბილიტაციის პროექტი 2012 წლის აპრილში, დაიწყო. მაშინ სამკურნალო და ტურისტული ცენტრის აღსადგენად მსოფლიო ბანკმა 3.5 მილიონი ლარი გამოყო. ახალ პარკში მოეწყო ველოტრასა და სარბენი ბილიკები, გაკეთდა საბავშვო გასართობი მოედანი, დამონტაჟდა დასასვენებელი კუთხეები და დაიდგა სავარჯიშო ტრენაჟორები.

„ახტალა" საქართველოში ტალახით სამკურნალო ერთადერთი კურორტია. ახტალის ტალახით მკურნალობენ ძვალ-სახსროვან, პერიფერიული ნერვული სისტემის, გინეკოლოგიურ, დერმატოლოგიურ, უროლოგიურ და სხვა დაავადებებს.

ავტორ(ებ)ი: სოფო ქსოვრელი

COMMERSANT.GE


© 2011-2017, TRAVEL IN GEORGIA.