ხშირად დასმული კითხვები ავტორიზაცია  |  რეგისტრაცია
სიახლეები
კოლხეთის მოხალისე - გაიცანი კოლხეთის ეროვნული პარკის მრავალფეროვნება
12 ოქტომბერი, 2018

კოლხეთის ეროვნულ პარკში პროექტი "კოლხეთის მოხალისე" მიმდინარეობს. პროექტი 3 სექტემბერს დაიწყო და ფოთის სხვადასხვა სკოლის 14 მოსწავლე მონაწილეობს.

მოსწავლეები კოლხეთის ეროვნული პარკის ბიომრავალფეროვნებას, მის საერთაშორისო მნიშვნელობას და ეკო ტურისტულ სერვისებს გაეცნენ. ისწავლეს თუ როგორ დაიტანონ ქალაქში არსებული სხვადასხვა ტურისტული ობიექტი რუკებზე Google Pin-ის საშუალებით, როგორ შექმნან და განათავსონ რეკლამები სოციალურ ქსელში.

პრაქტიკული ნაწილის ფარგლებში განხორციელდა ორი ეკო ბანაკი ფოთსა და ანაკლიაში. ეკო ბანაკის განმავლობაში მოსწავლეები თავად გავიდნენ კოლხეთის ეროვნული პარკის სხვადასხვა ტურისტულ მარშრუტზე და კაიაკებითაც გაისეირნეს. პროექტის მონაწილეები ეროვნული პარკის სხვადასხვა ტერიტორიაზე განთავსებული ფრინველების სათვალთვალო კოშკურებიდან ფრინველებს დააკვირდნენ და მათი იდენტიფიცირებაც მოახდინეს.

პროექტის განმავლობაში დასუფთავების აქციაც მოეწყო. დასუფთავდა მდ.ფიჩორის ხეობაში არესებული საპიკნიკე ადგილი და ასევე კოლხეთის ეროვნული პარკის ადმინისტრაციის მიმდებარე ტყე-პარკის ტერიტორია.

პროექტის მიზანს მოსწავლეების ეკო ცნობიერების ამაღლება , მოხალისეობრივ საქმიანობაში მათი ჩართვა და რეგიონში ეკო ტურიზმის პოპულარიზაცია წარმოადგენს.

პროექტს "კოლხეთის მოხალისე" კოლხეთის ეროვნული პარკის მეგობართა ასოციაცია მშვიდობის კორპუსის ფინანსური მხარდაჭერით ახორციელებს.

www.travelinegeorgia.ge


© 2011-2017, TRAVEL IN GEORGIA.