ხშირად დასმული კითხვები ავტორიზაცია  |  რეგისტრაცია
სიახლეები
ჰოლანდიური რეალითი შოუს გამო, საქართველოში მილიონობით ტურისტს ელიან
12 იანვარი, 2018

ჰოლანდიური რეალითი შოუ, რომლის გადაღებები საქართველოში მიმდინარეობს, იმედოვნებენ, რომ ქვეყანას ჰოლანდიელი ტურისტების ნაკადს გაუზრდის.

საინფორმაციო სააგენტო “პირველმა“ ჰოლანდიის ერთ-ერთ ყველაზე რეიტინგულ ტელეარხ Avrotros-ზე რეალითი შოუს wie is demol-ის საქართველოში გადაღებული კადრების ექსკლუზიურად მოპოვება შეძლო და ჰოლანდიური გადამღები ჯგუფის ქართველ პროდიუსერს ნინო აღლაძეს ესაუბრა.

ჰოლანდიაში უკვე შოუ 18 წელია გადის და რეიტინგი ყოველწლიურად იზრდება. რეალითი შოუს კონცეფციის მიხედვით, მის ყველა სეზონს სხვადასხვა ქვეყანაში იღებენ და სტატისტიკის მიხედვით, შოუს მაყურებელთა 50% ჩადის იმ ქვეყნის სანახავად, რომელშიც სათავგადასავლო ეპიზოდებია გადაღებული.

როგორც „პირველთან“ საუბრისას ნინო აღლაძე აღნიშნავს, ლოკაციების შესარჩევად ჩამოსული ჯგუფი საქართველოში აღფრთოვანდა და იმის ნაცვლად რომ დაგეგმილი 5 ეპიზოდი ხორვატიაში გადაეღოთ, ათივე ეპიზოდის საქარტველოში გადაღება გადაწყდა და გადაღებებიც მაისიდან დაიწყო.

მისივე თქმით, ჰოლანდიაში საქართველო არ არის პოპულარული ტურისტულად და ამ შოუს ისეთი სტატისტიკა აქვს, როცა wie is demol-ს ეპიზოდები ეთერში გავა, მაშინვე დაიწყება საქართველოში სამოგზაურო ჯავშნების შეკვეთა და ეს პროცესი მთელი წელი გაგრძელდება.

„სხვადასხვა პროექტთან დაკავშირებით, საქართველოში ბევრი გადამღები ჯგუფი ჩამომყავს და ყველა აღნიშნავს რომ ჩვენს ქვეყანას გადასაღები ლოკაციების ბიზნესის განვითარების კუთხით დიდი პოტენციალი აქვს. ჰოლანდიური რეალითი შოუსთვის შერჩეულ გადასაღებ ლოკაციებს და ბუნებას რაც შეეხება, ჩვენი ქვეყანა ამ შოუში ყველანაირად წარმოჩინდება. ვიწყებთ დედაქალაქიდან და შემდეგ უკვე გადავდივართ რეგიონებში. სამწუხაროდ ვერ ავითვისეთ ზღვისპირეთი, თუმცა ისეთ ლოკაციები ჩავსვით აღფრთოვანდნენ“, - ამბობს „პირველთან“ ნინო აღლაძე.

რეალითი შოუში მონაწილეობს ათი პოპულარული სახე - მსახიობები, მუსიკოსები, ტელეწამყვანები და ა.შ. თითო ეპიზოდიდან თითო მოთამაშე ვარდება.

თამაშის ინტრიგა ისაა, რომ რეჟისორის და პროდიუსერების გარდა არავინ იცის, რომელ ქვეყანაში მოხვდებიან. ამას მხოლოდ აეროპორტში იგებენ. ნინო აგლაძე ამბობს, რომ მონაწილეებმა საქართველოს შესახებ საერთოდ არაფერი იცოდნენ. აქ ჩამოსვლის შემდგ, მოთამაშეებს, საქათველოს სხვადასხვა კუთხეში, სხვადასხვა სახის დავალებებს აძლევენ. დავალებების შემდეგ ისინი გამოიმუშავებენ გარკვეულ თანხას.

ქართველი პროდიუსერის პროგნოზით, წელს საქართველო მილიონობით ჰოლანდიელ ტურისტს უნდა ელოდოს და შესაბამის სტრუქტურებს და ტურისტულ დაწესებულებებს ვიზიტორთა დიდი ნაკადისთვის დასახვედრად მომზადებას ურჩევს.

 




© 2011-2017, TRAVEL IN GEORGIA.