ხშირად დასმული კითხვები ავტორიზაცია  |  რეგისტრაცია
სიახლეები
გერმანიისა და აზერბაიჯანის შემდეგ, ქართული კასრები და მისგან დამზადებული ავეჯი ყაზახეთში გაიყიდება
11 აგვისტო, 2017

კომპანია „პროფესიონალური მეღვინეობის პროდუქტები” გურჯაანში კასრებს 2013 წლიდან აწარმოებს, ნახევარი წლის წინ კი კომპანიამ წარმოებას კასრისგან დამზადებული ავეჯიც დაუმატა. კომპანიის დირექტორი ვასიკო კალანდაძე „საქმის კურსთან“ საუბრისას ამბობს, რომ ამ ეტაპზე ქართული პროდუქცია იყიდება გერმანიასა და აზერბაიჯანში, უახლოეს პერიოდში კი ქართული კასრები ექსპორტზე ყაზახეთშიც გავა. გაზრდილი მოთხოვნის ფონზე, კომპანია ავეჯისა და კასრის წარმოების ხაზების გაყოფას გეგმავს. ამ ეტაპზე „პროფესიონალური მეღვინეობის პროდუქტები” წელიწადში 400-მდე კასრს და 800-მდე ავეჯს აწარმოებს. 

„ევროკავშირში დიდი მოთხოვნაა კასრისგან ნაწარმოებ ავეჯზე, რადგან კასრების წარმოება ევროპაშიც ხდება, ხოლო აზიაში კი ორივე პროდუქციაზე საკმაოდ დიდი მოთხოვნაა. 

საქართველოში მუხის მოჭრა არ შეიძლება, ამიტომ ნედლეული ევროპიდან და ამერიკიდან შემოგვაქვს“, - ამბობს ვასიკო კალანდაძე. საწარმოში ამ ეტაპზე 15 ადამიანია დასაქმებული. ამერიკული მუხისგან დამზადებული კასრის ფასი 1300 ლარია, ფრანგულისგან 1500, ხოლო ავეჯის ფასი კი 300 ლარიდან იწყება. 

„წარმოების დაწყების პერიოდში პრობლემა შეგვიქმნა ლარის გაუფასურებამ, თუმცა ამჯერად სიტუაცია სტაბილურია. აქამდე მეღვინეებს საქართველოში კასრები შემოჰქონდათ, იმპორტი კი ყველასთვის ხელმისაწვდომი არაა, რადგან ძვირი ჯდება. კასრს სჭირდება მოვლა-პარტნობა, გარეცხვა, - ჩვენ კი სრული სერვისს ვთავაზობთ მომხმარებელს. 

საჰაერო ექსპორტისაკმაოდ ძვირი ჯდება, ამიტომ სახმელეთო ტარნსპორტით ვახდენთ ექსპორტს. საქართველოს გეოგრაფიული მდებარეობიდან გამომდინარე, აზიაში ექსპორტი უფრო იაფი ჯდება, ვიდრე ევროპაში“, - ამბობს ვასიკო კალანდაძე „საქმის კურსთან“ საუბრისას. 

კომპანია ავეჯის წარმოების ხაზის გაფართოებას და პროდუქციის მომხმარებლისთვის ინტერნეტით შეთავაზებას გეგმავს.

www.bm.ge


© 2011-2017, TRAVEL IN GEORGIA.