ხშირად დასმული კითხვები ავტორიზაცია  |  რეგისტრაცია
სიახლეები
განადგურებული პანოს გამო სისხლის სამართლის საქმე აღიძრება
14 მარტი, 2018

რუსთაველის გამზირის #16-ში მდებარე ოფიცერთა სახლის სარდაფში განთავსებული, კირილე ზდანევიჩის მიერ 1919 წელს მოხატული კედლის პანო განადგურებულია.

კულტურული მემკვიდრეობის დაცვის ეროვნული სააგენტო მიმართავს სამართალდამცავ ორგანოებს, რომ უმოკლეს დროში მოხდეს მომხდარის გამოძიება და სამართალდამრღვევის მიმართ გატარდეს კანონმდებლობით გათვალისწინებული ღონისძიებები. პოლონური წარმოშობის ქართველი მხატვრის, კირილე ზდანევიჩის მიერ შესრულებული კედლის მოხატულობა უნიკალურია არა მხოლოდ მისი მაღალი მხატვრული ფასეულობის, არამედ საერთო კულტურული კონტექსტის გამო.

შემთხვევის ადგილზე იმყოფებოდნენ კულტურული მემკვიდრეობის დაცვის ეროვნული სააგენტოს გენერალური დირექტორი ნიკოლოზ ანთიძე, თბილისის მერის მოადგილე ილია ელოშვილი და სამხატვრო აკადემიის მხატვარ-რესტავრატორთა ჯგუფის წევრები. სწორედ ამ რესტავრატორების მიერ და სააგენტოს ორგანიზებითა და დაფინანსებით, 2 წლის წინ ჩატარდა კირილე ზდანევიჩის მიერ შესრულებული კედლის მხატვრობის შემორჩენილი ფრაგმენტების კვლევითი ანალიზი.

ამჟამად ოფიცერთა სახლის პირველი სართულისა და სარდაფის ტერიტორია კერძო საკუთრებაშია, ფართის მეიჯარე აცხადებს, რომ ხელშეკრულების გაფორმების მომენტისათვის რემონტი დასრულებული იყო და პანო აღარ არსებობდა

“როგორც გაირკვა, ისტორიულ პანოზე ფიზიკური სამშენებლო სამუშაოების ჩატარების შესახებ ახალ მესაკუთრეს არც სააგენტოსთვის და არც მერიის შეაბამისი სამსახურებისთვის არ უცნობებია და შეუთანხმებია, რაც ცალკე სამართლებრივი პასუხისმგებლობას ითვალისწინებს“, - განმარტავენ კულტურული მემკვიდრეობის დაცვის ეროვნულ სააგენტოში.

აღსანიშნავია, რომ 1918 წელს თბილისში, რუსთაველის გამზირის #16-ში მდებარე სახლის სარდაფში დაარსებული კაფე „არგონავტთა ნავი“ ტფილისური კულტურული ცხოვრებისა და ქართული ავანგარდის ერთ-ერთ ცენტრს წარმოადგენდა. ამ კაფეში კირილე ზდანევიჩის მიერ შესრულებული კედლის მხატვრობა კი უნიკალური იყო იმ თვალსაზრისითაც, რომ მსოფლიოში ძალიან მცირე რაოდენობითაა შემორჩენილი ზდანევიჩის მიერ შესრულებული კედლის მხატვრობა, საქართველოში კი ეს ერთადერთი იყო. 

www.travelingeorgia.ge


© 2011-2017, TRAVEL IN GEORGIA.